مسلمانوں کی قومیت

آزادی سے پہلے برّصغیر ہند میں قومیت کے مسئلہ پر دو نقطۂ نظر تھے۔ ایک اقبال کا۔ اُن کا کہنا تھا کہ قومیت کا تعلق مذہب سے ہے۔ دوسرا نظریہ مولانا حسین احمد مدنی کا تھا۔ اُنہوں نے کہا کہ موجودہ زمانہ میں قومیں اوطان سے بنتی ہیں۔ یعنی عقیدہ کا تعلق مذہب سے ہے اور قومیت کا تعلق وطن سے۔ میرے نزدیک مولانا حسین احمد مدنی کا نظریہ درست تھا۔ میں سمجھتا ہوں کہ مذہب کے اعتبار سے ساری دنیا کے مسلمانوں کا ایک مذہب ہے۔ مگر جہاں تک قومیت کا سوال ہے، اس کا تعلق وطن (homeland) سے ہے، یعنی جس مسلم گروہ کا جو وطن ہے وہی اُس کی قومیت ہے۔

اس کا مطلب یہ ہے کہ ہندستان جیسے ملک پر اگر کوئی مسلم ملک حملہ کرے تو یہ حملہ مسلمانوں کے مذہب پر حملہ نہیں ہوگا بلکہ اُن کے مشترک وطن پر حملہ قرار پائے گا۔ وطن کے خلاف جارحیت کے معاملہ میں مسلمان بھی اُسی طرح دفاع کریں گے جس طرح اُن کے غیر مسلم برادران وطن کریں گے، خواہ یہ حملہ بظاہر کسی مسلم ملک نے کیا ہو یا غیر مسلم ملک نے۔(الرسالہ اگست، 2000، جودھپور کا سفر)

ایک غیر حقیقی سوچ

علامہ اقبال کی ایک نظم ہے ، جس کا عنوان ہے، وطنیت۔ اس میں وہ کہتے ہیں کہ 

تہذیب کے آزرنے ترشو ائے صنم اور

اِس کے بعد ان کا اگلا شعر یہ ہے 

اِ ن تازہ خداؤں میں بڑا سب سے وطن ہے

جو پیر ہن اس کا ہے ، وہ مذہب کا کفن ہے

یہ نظم کلیاتِ اقبال کے بانگِ درا میں شامل ہے۔ اقبال کے اِس شعر کا اسلام کی تعلیمات سے کوئی تعلق نہیں ۔ موجود ہ دنیا میں قومیت (nationhood)کو مبنی بر وطن (homeland based)چیز سمجھا جاتا ہے ۔ میرے نزدیک اِس تصور میں اوراسلام میں کوئی ٹکراؤ نہیں، مگر اقبال کے ذہن میں اسلام کا وہ تاریخی تصور تھا، جو بعد کو مسلم ایمپائر کے زمانے میں بنا۔ مسلم ایمپائر کے دَور میں سارے مسلمانوں کا وطن ایک ہی مانا جاتا تھا، لیکن دوسری عالمی جنگ کے بعد جب مسلم ایمپائر ٹوٹ گیا اور پچاس سے زیادہ الگ الگ ملک بن گئے تو اب مسلمانوں کی قومیت اُن کے موجودہ وطن کی نسبت سے متعین کی جائے گی۔ اِس معاملے میں مسلم ایمپائر کا زمانہ کوئی معیاری چیز نہیں ، قدیم مسلم ایمپائر مسلمانوں کی سیاسی تاریخ کا ایک وقتی ظاہر ہ تھا، وہ اسلام کا دوامی حصہ نہیں۔ (ڈائری، 12دسمبر 2007)